لساك يا قلبى

لساك يا قلبى

لساك يا قلبى خايف

من الشعلقة فى الحبال

لساك خايف من السيرك

لا تبقى فيه بهلوان

تتنطط من هنا لهنا

وتضحك وتبكى بزيف

ترسم بسمة بدمعة

وكآبه زيف أو غيظ

خايف تكون كداب

من برة وجواك لأ

فارد قلوع القوة

وقلبك شايل ضعف

كاتب مشاعر بالوشوش

وإتلونت بمليون لون

ولسة البليتة لافضت

ولا خلص عرض النجوم

نجوم بتبهر من برة

بس أصلها كوكب

لا بتضوى نور ولا بتحرق

دا زيف وبردوا متركب

شايف حقيقتك ومصدق

كدب القلوب حواليك

لا تبكى بقى ولا تغرق

مانت اللى عامى عينيك

شيل الغمامة من وشك

وبص لبداية الطريق

إعرف حقيقة اللى سرقك

  وإعرف يا قلبى إنت مين

هاتغير يا قلبى

هاتغير يا قلبى

 هاتغير يا قلبى وهخرج من الشرنقة

هبعد عن اللى عشته واسيب حزنى وبكى

هابقى زهرة جديدة وأتلون باللى أحبه

أحمر وردى وبمبى أبيض بنفسج بحبه

هرمى ورقى اللى مات وأطلع غيره الجديد

أبدل فيه السواد وأجيب ألوان العيد

هارسم فيها وأشكل وأنور فيها الشمس

وأدفى بلون الفرح وابعد هموم الحزن

هكون فيها حد تانى من بره ومن جوا

هاعشق كل الأمانى  وأملى اللى فيه قوة

هفتح كل الحواجز وأصد وهم الجراح

هعيش أحسن من الكل  بفرحتى وقلبى

أبيض لا يعرف ضعف ولا حزن فيه مستخبى

هارمى قلوع حلمى وأتوكل ع اللى خلقنى

يزيح بحور همى وأرسى فى مراسى سعدى

أشوف دنيتى جنة وآخرتى أبنيها

أموت وأنا كلى فرحة وأسيبها ميراث وأهديها

لكل قلب عرفنى وشوفت معاه ذكرى

بهديله وردة وبسمة ودعوة بالجنة

وحب الناس طول عمره ينفعهم دنيا وآخرة

هاتغير يا قلبى